徐偉棟認與姚子羚了解中 稱行動緩慢望給予空間

姚子羚 同 徐偉棟 嘅姊弟戀緋聞，隨住兩人承認「了解中」後，大家都好關心呢對友達以上戀人未滿嘅朋友幾時會升格做拖友。徐偉棟呢日現身一個首映禮時，透露同Elaine嘅關係冇咩進展，仲自認自己喺呢方面行動相當緩慢，但佢就話希望大家比啲空間，唔好咁關注佢哋嘅關係喇。

佢又表示妹妹徐穎堃被記者追問時都好擔心講錯嘢，至於問到而家仲欠缺啲咩兩人先可以成為情侶？徐偉棟就話呢條問題好難答，因為如果可以一擊即中就唔需要用時間去了解。

徐偉棟呢日係嚟支持一部馬來西亞電影嘅首映禮，作為主演嘅張繼聰因為唔喺香港，所以宣傳電影嘅責任放喺吳肇軒同菁瑋身上，吳肇軒坦言從張繼聰身上學到唔少演喜劇嘅要訣，不過估唔到拍攝途中竟有機會接受羅家英嘅粵劇特訓，佢話自己讀演藝時都有學過少少，所以佢曾經打過一招飛腿比家英哥睇，點知家英哥叫佢踢二十個，踢完二十個又叫佢踢十個，吳肇軒就講笑話覺得家哥係玩緊佢，不過，身旁嘅菁瑋就即刻為家英哥平反，話如果練功嘅話，踢二十個係基本要求呀。