鄭秀文澳門演出嘉賓衛蘭感激鼓勵 五臟六腑血管流淚裙成新寵

鄭秀文 嘅澳門演唱會舉行到第7場，除咗有 衛蘭 擔任表演嘉賓之外，其中一襲由時裝設計師Tomas Chan打造嘅「五臟六腑血管流淚裙」就令Sammi愛不釋手。佢話：「用咗好多人手去縫製，其實係五臟六腑嚟㗎！Tomas Chan寓意係傷心到五臟六腑都識得流眼淚，呢條裙我特別鍾意，好靚！」

Sammi呢晚邀請Janice任嘉賓，兩人手拖手合唱，之後Janice感謝Sammi對自己嘅鼓勵話：「你畀咗好多信心我，好多年前鼓勵我keep fit，我真係好努力做gym。我好多謝你，就係Sammi團火好感染到大家！」而Sammi就回應話：「我睇住你出道、睇住你成長，尤其呢幾年喺樂壇成績咁好，仲穿州過省做咁多場演出，真係戥你開心。我哋有共同信仰，所以特別投契。」

Sammi又笑指自己年事已高，唔知仲有幾多精力繼續唱，之後仲笑言要返後台食麵同換衫，Janice就演唱新歌《The Best Version Of Me》。

Sammi之後唱完《唯獨你是不可取替》後話：「人生裏面我哋都有屬於自己嘅故事，一段關係入面都有當中嘅苦同甜，我覺得人生經歷過咩嘢都唔重要，最重要係經歷過後體會到咩嘢，同埋回頭望發現係一場好美麗嘅祝福，所有嘢都變得更加好。」

之後最近宣佈將再同兄弟合體開騷嘅 許志安 就上台，以鋼琴彈奏《世紀末煙花》，Sammi再話：「我想講，我好幸福，多謝你哋！」安仔並甜笑點頭一齊合唱。