蔡一傑捧偶像中村雅俊演唱會 胡慧冲來港圓夢合照感動流淚

日本殿堂級歌手 中村雅俊 來港舉行入行50周年演唱會，喺兩個半小時演出中，中村雅俊獻唱咗唔少令大家充滿回憶嘅金曲。唔少粉絲都把握呢個值得紀念嘅機會捧場，當中包括做完開腦手術後，現正休息調養身體嘅 蔡一傑 。

傑仔去年尾公開患腦瘤後罕有現身公開場合，戴帽嘅傑仔精神奕奕現身會場欣賞，仲去到後台同偶像影合照，聽到一個充滿童年回憶嘅騷後，傑仔寫上感言「中村雅俊先生可以見證你50周年的演唱會實在太感動了，想一想小學的時候時常看你的電視劇和聽你的歌曲一眨眼已經是很久的事，不經不覺自己也入行40年了，時間過得真快，沒有你們也沒有我們，沒有我們也沒有他們、我們大家一起繼續努力。」 

捧場嘅粉絲仲有向海嵐，同埋專程喺泰國返港嘅胡慧冲，Roger睇完騷後話終於圓夢，仲可以去後台合照，聽到充滿集體回憶嘅歌曲，佢都話忍唔住喊咗出嚟。佢又不失搞笑個性，指演唱會當晚唔少人搵佢合照，佢話可能大家覺得同唔到中村雅俊合照，同佢影相都好過冇。佢仲透露偶像應該出年會有個關於「前程錦繡」嘅記錄短片出現，所以騷上有日本嘅攝製隊盡力拍底大家開心感人一面，佢話自己都被拍得喊嘅畫面，希望呢啲咁精彩嘅片段出年可以睇到，亦希望呢啲片段可以打動我哋嘅偶像。