中年好聲音3丨任永健獲兩局長撐場粉絲聚會 親吻答謝太太無限量支持追夢

《中年好聲音3》14強止步嘅任永健，雖然喺比賽中未能獲勝，但佢好開心能夠收獲一班欣賞自己歌聲嘅粉絲。呢日佢就相約一班支持者舉行Fans meeting，永健嘅家人同《中聲3》嘅戰友都拉大隊嚟支持，連發展局局長甯漢豪同埋房屋局局長何永賢都有到場，令永健相當感動。

永健笑言聚會好似搞咗場婚宴，仲搵嚟《中聲3》戰友做嘉賓。大家入場時仲可以抽永健嘅閃卡，當中包括騷肌嘅相。成個聚會大家都玩得好盡興，《中聲3》唱將仲唱爆舞台，連永健嘅大仔都上台表現大唱洗腦歌《APT.》，永健又感激太太無限量支持，令佢無後顧之憂去追夢，佢仲喺鏡頭前獻吻報答太太嘅愛。