黃劍文感嘆餵貓食藥難度高 周慧敏出手相助拍攝教學短片

娛樂圈中有唔少貓奴， 黃劍文 亦係其中之一，愛貓成癡嘅Kimman曾經講笑話「湊貓」先係自己嘅正職，甚至連拍MV都出動愛貓，不過近日Kimman屋企幾隻貓輪流生病，就令Kimman好擔心。

有養過貓嘅人都知道，要餵貓食藥難度有幾高，餵藥失敗事小，一個唔小心仲可能受傷添，有鑑於此，Kimman就精心製作咗一條餵貓食藥嘅教學短片，仲請到另一位貓奴 周慧敏 客串老師。

片中雖然Vivian冇露面，但全程聽到佢用溫柔嘅聲線講解餵貓食藥嘅技巧，見Vivian一邊氹貓擘大口，一邊好熟練咁將藥丸塞入貓口中，成個過程唔使十秒鐘，一旁拍片嘅Kimman都忍唔住讚嘆。

Kimman話自己曾經試過餵藥時被貓咬傷，所以睇Vivian餵藥，自己都好肉緊，估唔到Vivian兩三下輕鬆搞掂幾隻貓，不過始終每隻貓性格唔同，各位貓奴餵藥時切記要打醒十二分精神，小心為上。