Tyson Yoshi 鬧市派海報引「屍潮」親解個唱舞台設計方便大家飛Bra

獨立歌手Tyson Yoshi 下月將會喺啟德舉行兩場演唱會，而日前優先訂票秒速售罄，所以呢日Tyson就揸住佢架私人珍藏嘅1994年古董跑車，去到旺角同銅鑼灣嘅鬧市派發演唱會海報謝票，兼為3號公開發售嘅演唱會宣傳。

Tyson架古董跑車邊行駛邊廣播個唱宣傳廣告，引嚟唔少fans及途人圍觀，而當Tyson派發海報時更引起騷動，有喺現場嘅網民，就話驟眼睇就好似喪屍圍城咁，數百張海報亦迅即派光，相當誇張！

謝票期間，Tyson化身我是賣飛的「程議員」，首先答謝Fans們買飛支持，繼而呼籲仍未買飛嘅巿民多多支持，希望公售之日門票可以同樣「秒爆」。Tyson指身為獨立歌手要開騷真係唔容易，而且今次你挑戰可以容納一萬名觀眾嘅啟德體藝館，所以有唔少賣飛壓力，佢坦言優先訂購開賣前一晚擔心到失眠，幸好大家反應熱烈，佢先可以鬆一口氣。Tyson又指喺網上見到fans自製嘅「泰神耀西搶飛成功符」，務求可以成功搶飛，令Tyson覺得搞笑得嚟又窩心。

對於早前有fans誤墮假飛陷阱，Tyson就再三澄清佢演唱會 並 沒 有  VIP 及 Meet & Greet 環節：「希望大家循正式渠道買飛，不要助長騙徒及黃牛，如果公售反應熱烈，我承諾大家一定會加場，滿足大家的需求！」

今次演唱會有一條超長舞台，Tyson指呢個設計係希望場館四面嘅觀眾都可以睇到佢嘅表演，同時亦方便大家由四方八面飛 Bra 上台，Tyson笑言到時會「多嚟嚟密啲手」，又承諾會喺演唱會中盡地一煲騷肌：「若然有幸運兒成功入手 A 行，我保證距離超近，近到『睇到粒 Lin』那一種，所以大家要繼續努力搶飛，『向粒 Lin 出發』，哈哈！」