吳若希澳門演唱會挑戰性感熱舞 麥美恩到場獻花攬大脾支持

吳若希 嘅澳門演唱會日前圓滿落幕，現場座無虛席。Jinny老公同囝囝「博豬」，以及好友 麥美恩 周奕瑋 朱敏瀚 丁子朗 胡鴻鈞 鄭衍峰 莊思敏 王子涵 丁文俊 陳曉華 戴祖儀 陳楨怡 何猷亨等專程到場支持。

今次係Jinny入行十五年來首次澳門開唱，所以精心準備重磅驚喜。佢曾透露要展示性感一面，今次演出更可謂脫胎換骨，唔止換上多套女團風格性感歌衫，更於舞蹈員伴隨下，一口氣又唱又跳自己歌曲《召喚絲》、張惠妹嘅《Bad Boy》同60年代經典英文歌《Venus》，令全場觀眾驚喜不已。​

Jinny話：「一直以來，我嘅歌都係劇歌、情歌，今次演唱會令我發現，原來我都可以成為一個跳唱歌手。真心感謝陪我排練多日嘅排舞老師同舞蹈團隊，仲有今次演唱會嘅形象設計，令我知道原來我都可以行型格路線。」

麥美恩獻花支持仲攬住Jinny大腿示愛，Jinny就以「I Love You」 回應。而演唱會特別嘉賓詹天文 就為觀眾獻唱《一切都是有原因的》同《大雕刻家》。​Jinny隨後獻唱經典熱門歌曲《火和火柴》《別再記起》《我沒有傷心》。之後粉絲代表送上生日蛋糕，補祝Jinny嘅33歲生日，同時祝賀入行15周年。而唱到《感激跟你能夠遇見》時，Jinny仲一時感觸落淚。最後全場大合唱以《越難越愛》為演唱會畫上圓滿句號。​

演唱會結束後，Jinny喺後台仍感動落淚，原來因為開騷前曾失聲，開演前一日先及時恢復。對自己唱跳環節佢就為自己打98分，稱已盡全力，由一首歌要學三日，到最終可於舞台上獨唱，佢認為都值得為自己感動落淚。