古巨基內地演出遇城城興奮曬合照 兩代五阿哥合體掀回憶殺

古巨基 最近為內地一個慶祝618購物節嘅音樂會於北京演出，仲同 蘇有朋 罕有合體，過往兩人都曾經演過著名劇集《還珠格格》嘅五阿哥，掀起網民嘅集體回憶，所以「兩代五阿哥合體」登上內地微博嘅熱搜。 

古巨基喺微博度貼出佢同友朋嘅合照，貼文話:「舞台上有書桓杜飛」，2000年時兩人一齊合演另一部瓊瑤經典劇集《情深深雨濛濛》。唔少網民更大讚佢地嘅友誼可以維持二十多年不變。

另外基仔亦有貼出分別同郭富城以及容祖兒嘅合照，話喺後台撞到唔少好友，不過未知係咪美顏瀘鏡太重手定係拍攝角度問題，城城唔止睇落超級年輕，面形仲同平時有所不同，五官變得超級精緻。

城城呢日喺音樂會度連續演唱《對你愛不完》、《動起來》等經典快歌表現神勇，以近60歲之齡，獲唔少網民稱讚佩服，更封佢為「天王級初代唱跳天花板」。