黃智雯 同 周國賢 呢對咁新鮮嘅組合，嚟緊將會合作舞台劇。兩年前已經演出過呢個劇目同朱栢謙合作嘅Mandy，今次換上首度合作嘅Endy，對手雖然由彈琴變成彈結他，不過超級難記同有梵文嘅對白就依舊不變，自認記性差、連自己歌嘅歌詞都記唔到嘅Endy就話非常難搞。
上一次公演時，曾有好多觀眾問Mandy，咁難記嘅對白係咪有提示器協助？佢就強調大家都係完全由零開始排練出嚟，所以Mandy話佢哋係要高度集中，唔可以有絲毫嘅分心呀！
而為咗背對白，Mandy笑言一有空隙就會念念有詞背誦，佢又指最大挑戰嘅一幕，係6頁紙嘅個人讀白，加上一人要分飾十多個角色，要用聲音同肢體去表達每個角色嘅特性，所以排練時需非常專注，唔敢傾閒偈，畀人生人勿近嘅感覺。劇中有一幕Endy要揹起Mandy，佢就話因為Mandy再減磅就會畀風吹走，所以只好自己增磅變大隻呀。
盛傳有唱片公司向Endy招手，下半年佢就會告別獨自歌手身份，成為容祖兒、張敬軒嘅師弟，呢日Endy就話船到橋頭自然直，到時大家就會知道咁話喇！
