TVB全新節目《一日打工限定》，藝人輪流上陣體驗各行各業嘅辛勞，5號播出嘅一集就輪到 吳偉豪 體驗裝修師傅嘅日常。
Rico去到一個全新屋苑，喺師傅細心指導下落手落腳裝修，Rico話自己對裝修其實零知識，屋企如果有咩地方需要裝修，都係由父母一手包辦，所以今次等於由零開始學習。
Rico雖然係參與一日限定裝修師傅工作，但係佢都非常認真，事前仲專登去上堂學基礎工序，喺一日課程中Rico學點樣鋪水泥，仲嘗試砌磚牆，不過原來節目拍攝當日，Rico需要做嘅工作同上堂學嘅完全唔同，唯有跟師傅即場惡補。
由零開始為一間屋裝修，其實齋想像都知幾有成功感，對於自己第時屋企嘅裝修風格，Rico都已經有諗法，「我自己就鍾意簡約啲，唔好太多嘢，因為而家屋企好多嘢，爸爸媽媽咩都唔捨得掉，如果我自己有屋企，就希望唔好有太多雜物，盡量簡約啲就已經好開心。」
《一日打工限定》星期一至五晚 22:30 翡翠台