藝人外出難免會被途人認出索簽名合照，但係如果影響到對方甚至做成危險就唔太好喇！好似周杰倫日前同太太昆凌去日本京都旅行時，就被喺當地嘅內地fans認出，消息更火速喺小紅書等平台宣揚開去，搞到大批fans蜂擁而至，將周董一行人圍困喺一間食店中。當周董離開時，眾人擠擁而上爭相要求合照，混亂期間周董同行嘅化妝師杜哥杜國璋，更被推倒在地導致骨折，事後周董連出多個限時動態，並詢問有冇人拍到杜哥跌倒嘅一刻。
周董今次京都之行，除咗同老婆昆凌及團隊旅行外，仲相約咗 山下智久 飯聚，不過佢哋嘅一言人一行都被喺當地嘅粉絲「監察」住，即使周董想喺餐廳後門離開，都有人守候喺度等佢簽名同合照，更有人將呢個圍倒情況拍片放到網上，並以「周杰倫被中國粉絲堵在了屎坑門口」為題。
周董唔只去到邊都寸步難行，就連安全都成問題，同行嘅化妝師杜哥就被人推倒在地，當時周董即時上前扶起對方，片中所見杜哥企起身後要靠雨傘借力先可以企定，不過身旁追拍嘅fans就完全冇理，繼續舉機影住周董。
事後周董喺限動中PO出杜哥受傷前後嘅相，指杜哥有兩處地方骨折，呼籲fans唔好再跟，大家遠遠打招呼就好，周董仲喺其中一個限動中寫道：「在他摔倒後，竟然還有人找他拍，然後他說，反正他也跑不掉……希望沒事」，而最後一個限動，周董就詢問眾網民：「心疼杜哥 不過還是想弱弱的問一下 有人拍到杜哥跌倒嗎……」
