大型慈善騷《萬眾同心公益金》將會喺6月7日晚上8點隆重舉行，五位大會司儀同有份演出嘅歌手藝員現身記招預告精彩演出內容，譚輝智上年邀請咗爸爸出山合唱，今年就同失散細妹關嘉敏合作，兩人將演出包含十一首歌嘅Medley，仲要唱跳，本身跳舞好叻嘅Carman大讚輝智跳舞實力大大提升，成功擺脫輝智Style，而輝智則表示今次想走型格路線，雖然舞蹈好難，但都盡力去記，因為唔想辜負咗Carman，睇返自己跳舞都有好多甩漏，大讚阿妹跳舞好叻。
Carman以靚靚形象現身星期日首播嘅全新節目《女神配對計劃》，之前一直如火如荼錄影中，Carman都話想請哎呀阿哥參加節目幫眼擇偶，更推薦輝智加入節目中嘅花生團，當追問輝智幫手擇偶嘅條件時，估唔到佢竟然話最緊要係有樣有錢就足夠。
而中聲3冠軍黃博首度為公益金演出，今次仲有兩位師兄周吉佩同古淖文旁住，三屆中聲冠軍首度合作舞台，令觀眾相當期待，黃博預告佢哋會組十人Live Band夾歌，揀咗好多唔同氛圍嘅歌送給觀眾。另一方面黃博正籌備新歌，將於稍後面世。
另外一眾聲夢唱將會聯合演出，加上有Johnny Yim音樂總監領軍，令張馳豪同鍾柔美勾起參加《聲夢傳奇》時嘅回憶。
