由言承旭、周渝民、吳建豪及朱孝天組成嘅台灣古早級經典男團F4，近日被指喺五月天所屬唱片公司協商撮合下，會喺2026年合體開騷慶祝成軍25周年，新聞一出如同一石激起千層浪，令外界期待又激動。
作為F4其中一員嘅周渝民，日前出席新劇宣傳活動時都有被記者追問事件。仔仔表示，呢類消息每一兩年就會傳一次，其實佢地都好希望可以一齊工作，只係佢希望，嚟搵佢地合作嘅人都應該清楚規劃之後行程，而唔係出嚟同大家講「F4要合體了」大賺一筆後又冇咩後續。
童星白潤音更被問以前有冇聽過F4，白潤音就話有聽過，但唔知裡面有邊個。仔仔幽默回應：「有我，我爸，我爺爺，我們主要是三代同堂的團體。」令全場大笑。
F4喺2009年正式解散，對上一次同台經已係2013年喺春晚演出，有指F4有機會展開亞洲巡演，而仔仔就透露過往難以成功合體原因：「F4我自己有自己的期望，如果只是單純想賺錢，那就不用特別來找我，做F4的活動基本上我沒有太大壓力，我是裡面年紀最小的，所以瘋瘋癲癲的，講什麼話我都無所謂，搞搞笑就好了。」而每次有資方問仔仔合體意願，仔仔都會反問對方有咩規劃，結果就不了了之，冇人可以俾到一個答案佢。
仔仔同拍檔薛仕凌分別喺6月9號同10號生日，劇組仲為兩人預祝生日，影后楊貴媚帶領大家唱生日歌，場面歡快。仔仔表示自己雖然平時唔會點過生日，但好感動大家為佢慶生，亦祝劇集收視長虹，希望呢套劇可以感動社會以及更多人會關心社會。
