繼陳奕迅嘅愛女康堤宣布簽約唱片公司做歌手之後，又一位星二代正式出道，就係鍾鎮濤同太太范姜嘅大女鍾懿。B哥哥5號喺微博宣布囡囡正式出道，將會喺韓紅擔任總導演嘅音樂綜藝節目《閃光的夏天》登台演出。
B哥哥喺微博宣布：「鄉親父老們請關注，我家小鍾懿正式出道了。新聲代音樂人鍾懿報道。唱中意的歌，在夏天閃光。」po文一出，隨即有大批網民送上祝福。
2004年出生嘅鍾懿今年21歲，啱啱喺英國大學畢業。其實鍾懿對演藝圈一啲都唔陌生，佢自細就經常同爸爸B哥哥一齊亮相幕前，亦曾經多次同爸爸喺演唱會上同台演出，年紀細細已經好有大將之風毫不怯場。
鍾懿早前參加薛之謙策劃嘅音樂節目，多數網友對佢嘅演出評價正面，覺得佢遺傳咗爸爸嘅音樂天賦，聲線辨識度高，而且台風穩健，外型青春有活力。而B哥哥為撐寶貝女，仲動員一眾uncle包括張學友、梁家輝等公開支持。
星二代出道除咗比實力，父母嘅影響力少不免都會被比較，B哥哥喺娛樂圈老友眾多，各個都係大人物，相信鍾懿已經贏在起跑線。
