陳法拉 早前返港參與電影頒獎禮後，即妝到未落急急腳離港到歐洲工作，近日佢又獲品牌邀請，飛到日本京都出席品牌頂級珠寶系列活動，同來自當地嘅著名演員安藤櫻、小松菜奈、官澤冰魚，以及韓國同台灣代表金高銀、昆凌 仲有泰國女星Chutimon Chuengcharoensukying 等共晉晚宴，法拉仲偷得浮生半日閒，工作之餘偷出少少時間參觀二條城歷史悠久嘅宮殿。
雖然此行只係匆匆三日，不過法拉就非常享受，因為當地嘅環境同體驗都令佢非常愜意，因為有機會穿梭傳統庭園、寺廟、博物館等特色建築物。雖然此行家人未有同行，不過眼前所見就令法拉感受到一份浪漫：「今次珠寶展喺一座博物館舉行，展出嘅頂級珠寶都非常華麗，造工精緻，中最有印象係是一款獅子主題珠寶。我哋又去咗山頂俯瞰整個京都市，一片薄霧瀰漫，好似置身仙境之中。」
今次之旅令法拉對京都甚有好感：「京都曾經係日本首都，我住嘅酒店對面係二條城，係世界遺產古蹟之一，工作中間有一小時休息時間，就立即去參觀一下。」法拉又出席大會於大德寺舉行嘅酒會，仲獲僧人以毛筆題字贈予「和顏愛語」四字。
偷閒遊名勝之餘，法拉亦大飽口福品嚐當地美食，其中一間有120年歷史嘅懷石料理，令佢食得津津有味：「呢三日度假feel下工作好充實，又做咗一陣遊客。十幾年冇講過嘅日文大派用場，仲可以同司機簡單溝通。」
