演唱會新場地啟德體育園啟用後， 楊證樺 就不時成為現場另類人肉打卡位，因為作為安全管理公司老闆之一嘅佢，出現喺各大演唱會同大型活動度執行保安工作，好似早前嘅謝霆鋒、林俊傑同五月天嘅演出，唔少市民都捕獲楊證樺專業工作嘅身影。
最近楊證樺仲以保安身份亂入《愛‧回家之開心速遞》，劇情講到巨星GDP嘅演唱會，請到Super Senior全體成員做嘉賓，楊證樺以一身黑色制服出場，由於之前佢曾以文醫生角色演出，所以飾演熊若水嘅呂慧儀見到楊證樺時問：「文醫生?你都嚟睇演唱會？」，而楊證樺就回應話：「我係呢度嘅保安主管楊證樺。」
唔少觀眾事後都希望「保安主管楊證樺」再度亮相《愛．回家》，最好仲係同楊太沈可欣飾演嘅Rebacca有同場互動戲份咁話。
而 呂慧儀 亦喺社交平台分享拍攝時嘅花絮，劇中化身巨星GDP同佢Selfie嘅其實係Hugo黃星綽。Hugo以韓流天王絲巾Look上陣，更悉心化咗個韓星妝絶不馬虎。原來拍攝呢集當日就係三太嘅樊亦敏生日，台前幕後都有為三太送上生日驚喜。
