因參加《中年好聲音3》而重新被觀眾看見嘅前男子組合Square成員 趙浚承Gary ，為咗令大家重新認識佢，喺網上頻道嘅節目《我的世界是圓的》中，以四集「挑戰」、「伯樂」、「際遇」、「家人」嘅主題，畀大家以唔同角度去全方位認識Gary。
首集以「挑戰」為題，節目中Gary要克服恐懼，佢到廣州塔挑戰全球最刺激嘅高空踩鋼線。而喺第二集「伯樂」入面，就走訪咗同為明星足球隊、畀咗唔少鼓勵Gary嘅前輩，當中包括譚詠麟、黃日華、陳友、徐榮及吳家樂等，佢哋會同大家分享佢哋眼中嘅Gary到底係一個點樣嘅後輩，同時又會畀啲鼓勵Gary。
另外，Gary同羅鈞滿喺疫情期間，知道有啲住喺深圳嘅跨境學童，因為無法返學亦無任何課外活動，所以就資助呢班小朋友場地，並安排教練畀呢班小朋友，喺學習外亦有團體交流機會，故而更成立「大灣區港人體育協會」。
至於第三集以「際遇」為主題嘅節目中，Gary會剖白由男團出道，到再踏上《中年好聲音3》舞台，呢段時間嘅際遇同心態，Gary更坦言自己參賽時最怕望到評判。
最後一集則以「家人」為主題，Gary直言最大嘅動力就係家人，佢喺節目中會首度公開，眾親人一直以來係點關心同支持自己繼續喺娛樂圈發展、繼續追夢。
