今年60歲嘅劉錫明，早年因為同周慧敏傳緋聞，被Vivian嘅老公倪震追擊，導致形象受損，仲被冠以「毒瘤明」封號，佢唯有敗走台灣同內地發展，近年主力喺內地搵食嘅劉錫明，不時被人野生捕獲，不過當年嘅俊朗小生，似乎敵不過歲月痕跡，變成中年脂粉大叔。
近日久違台灣幕前嘅劉錫明突然復出，為造型師兼歌手李明川嘅新歌《放心去飛》跨刀拍攝MV，展現寶刀未老實力，其中一場回顧過往人生嘅內心戲，佢發揮10秒落淚功力，一take過完成，連現場團隊都忍唔住讚嘆。
劉錫明喺MV中藉由泡茶、寫字等日常，傳達對過往人生嘅回顧同感謝，李明川表示：「這首歌的MV需要一位有資歷、有歷練、有演技的男神擔綱，『姐夫』就是我的不二人選。」講到兩人交情，原來李明川嘅大學同學係劉錫明太太嘅妹妹，所以跟住嗌「姐夫」，二人相識超過20年，本身係造型師嘅李明川，過去都曾經幫劉錫明做過造型，今次提出拍MV要求，「姐夫」當然一口應承。
講到今次MV內容要回望自己人生，問到劉錫明有咩特別難忘嘅畫面或者想見嘅人？佢就話：「只有我父親離世吧！他離開後，我曾經在夢裡見過他，以前他是一個不太笑的人，可是在夢境裡他很難得地對著我笑，也許是想告訴我他在天上過得很好。」
劉錫明近年生活低調，娶咗台灣太太做咗台灣女婿之後，經常台灣內地兩邊走，佢話自己唔工作嘅日子，多數時間會留喺台北陪屋企人。知道有好多粉絲掛念自己，劉錫明就話：「我的粉絲們可能都長大了，希望他們好好的，平平安安的，開開心心的。」
