香港出生嘅荷里活喜劇演員歐陽萬成Jimmy O. Yang，憑獨特幽默嘅棟篤笑風格迅速走紅，IG擁有246萬粉絲，喺全世界都擁有高人氣，佢首次進軍亞洲地區開騷，就選擇自己嘅出生地香港，而Jimmy本人亦以「回家」形容到香港開騷嘅感覺。
Jimmy近日應香港旅遊發展局邀請深入探索香港，遊覽包括有百年歷史嘅上環文武廟、昂坪 360 纜車，然後再到亞洲最佳酒吧體驗精緻雞尾酒以及品嚐地道燒味，一日之內體驗香港獨特文化、美食同城市魅力。
到本地人氣燒味店品嚐入口即化嘅蜜汁叉燒，再到亞洲頂級酒吧細味世界級雞尾酒，短短一日就能嚐遍各種滋味，Jimmy話自己生於香港，呢種滋味不單止係味蕾嘅享受，更加係佢成長回憶嘅一部分。Jimmy話：「我喺香港度過童年時光，一直深深感受到呢個城市嘅獨特活力。香港係一個融合傳統與創新嘅地方，一日之內便能穿梭於百年文化與自然美景之間。每個旅程都充滿驚喜，展現香港多元嘅城市風貌。」 
而旅發局亦希望透過Jimmy嘅第一身視角，向全球旅客展現香港獨特嘅文化魅力，吸引更多人親身到訪呢座萬象之都。
