又到每週嘅《電影泉攻略》，主持王鎮泉帶你搶先睇本週最新電影消息。本週有新戲《私家偵探》嘅三位演員古天樂、周秀娜同台灣演員劉冠廷作客，分享拍攝點滴。
新戲喺馬來西亞取景，周秀娜話自己拍攝空檔最鍾意留喺酒店做gym同游水。而古老闆就話自己就算去到馬來西亞都冇辦法放低工作，晚晚收工返到酒店都要開會，仲要處理拍攝現場各種狀況，完全冇時間放鬆。
至於劉冠廷就話自己喺戲中角色性格封閉，同外界有種疏離感，所以到陌生地方拍攝，反正更能夠幫助投入角色。
演員拍喊戲係基本功，不過劉冠廷同周秀娜初入行時都曾經被喊戲難倒，隨住經驗累積，先慢慢搵到箇中竅門。
古天樂亦分享自己投入角色嘅獨門方法，就係靠聽音樂，佢次次投入一部戲嘅拍攝，就會幫自己搵一首歌，首歌未必切合電影主題，可能係當時最hit嘅流行曲，亦都可能係兒歌，最重要可以幫助自己入戲就得。
本週上映嘅新戲有《私家偵探》，歐陽偉業係一名落魄嘅私家偵探，接受嘅委託多數都係微不足道嘅小case。有日佢收到一宗「特別」嘅捉姦委託：對象竟然係自己老婆。與此同時，多宗出軌謀殺案接連發生，兇手極有可能係同一個人，歐陽偉業將意外搵到嘅證據交俾調查警員陳康民，點知引發出一個極大謎團。
《馴龍記》，皇牌動畫真人版，講述喺荒蕪崎嶇嘅百格島上維京人同龍族世世代代互為死敵；不過隨住一股空前嘅威脅力量出現，兩方都身陷險境。嚟自維京族嘅思噎仔漠視傳統枷鎖，同與眾不同嘅飛龍冇牙仔，由相遇到深交，再共同開闢通往和平嘅道路，飛越各自國度嘅界限！
《罪人們》，全球影迷同影評談論度十足嘅驚悚作品，講述雙胞胎兄弟經歷咗第一次世界大戰嘅戰壕同芝加哥黑幫年代嘅洗禮，返到家鄉諗住重新開始，開一個能夠俾大家載歌載舞、徹夜狂歡嘅忘憂派對之地。呢個時候兄弟幫竟然發現，更大嘅恐怖邪惡正等住佢哋返去。
《那些年的我們》，改編自台灣作家九把刀嘅《那些年，我們一起追的女孩》。問題學生鎮佑被老師安排坐喺模範生班長善雅前面，善雅被迫成為佢嘅「監視者」。點知由不情願到初戀故事慢慢展開，但係佢哋都唔擅長表達自己嘅感情，心裡面隻小鹿越撞越激烈，掀起一段青春嘅浪漫旅程。
《武士撈過界》，幕末武士高坂新左衛門，喺一場激戰中意外被雷電擊中，竟然一劍劈開百年時空，穿越至現代日本，誤闖入時代劇片場，陰差陽錯下仲被當成臨時演員！本來以為就此安穩過日，點知幕未未了嘅宿命，仍然有未解嘅秘密等待揭曉….
本週票房龍虎榜，直至6月11日中午，第一位《史迪仔》；第二位《職業特工隊：最終清算》；第三位《殺神John Wick之芭蕾殺姬》。
