現年36歲、已為李澤楷誕下三子嘅梁洛施，自從2011年與李澤楷宣布分手後，一直專注照顧三子。近年兒子們開始長大，Isabella亦重投工作現身幕前，而佢嘅感情生活亦備受關注。直至去年Isabella被影到曾與張家輝參演《掃毒》、現年45歲嘅內地導演兼演員馬浴柯，現身北京一間咖啡室撐枱腳，即傳出二人拍拖消息，而兩人嘅戀情，亦因為近日被拍到十指緊扣甜蜜行街而正式曝光。
片中所見，Isabella與馬浴柯手拖手大大方方喺公眾地方行街，Isabella全程甜笑儼如沐浴熱戀中嘅少女，當馬浴柯邊行邊講話時，佢亦細心聆聽。Isabella嘅戀情曝光不足24小時，已成網上熱話，但當事人未有作出任何回應，Isabella只係喺社交平台分享自己喺健身室做運動嘅短片。
