《中年好聲音2》唱將 譚輝智 同爸爸 譚握籌 接受主播 潘盈慧 專訪，輝智參賽時曾經透過成家人都好鍾意唱歌，譚爸爸唔知道仔女係咪受自己影響，但佢就一向都好鍾意唱歌，太太亦受佢感染，繼而就一家人不時會一齊唱歌，佢仲讚家人們唱得好聽。
細細個就被爸爸讚唱歌好聽，係咪自細就有做歌手嘅諗法？輝智話以前覺得係大家客氣先讚佢，加上做歌手會有好多顧慮，又要顧及外貌，所以自覺不足。至於參加《中年好聲音2》嘅賽事，係爸爸從旁鼓勵，譚爸爸話「你都40歲，點解唔試一次呢！」佢又覺得輝智肯去參加，應該會有人會注意。輝智承認聽到爸爸嘅鼓勵，令佢大膽咗，加上又覺得唔去參賽，可能一世都再冇機會。
回顧輝智嘅參賽路途，譚爸爸覺得囝囝唱好多首歌都唱得好好，而印象特別深刻嘅就係《歸來吧》同《心碎了無痕》，現場聽係覺得有超水準表現。講到令人印象深刻，不得不提輝智嘅舞步，譚爸爸都話囝囝嘅舞功未到位，不過有隻舞就令佢不斷翻睇，就係輝智喺決賽晚跳嘅《屈到病》，因為佢覺得輝智跳出自己風格，同時令大家睇得好雀躍。作為爸爸，佢覺得輝智有跳舞天份，但係要落苦功。
