早前喺謝霆鋒開騷時踏台備受關注嘅17歲女結他手Dale Wong，憑住紮實嘅音樂功底同獨特嘅個人魅力令佢成為炙手可熱嘅新生代人物，近日Dale獲邀同音訊品牌聯乘拍攝宣傳片段，短片中Dale自彈自唱、創作音樂，又會上網打機，將Dale之日常真實呈現。喺拍攝初期，Dale顯得有啲怕醜，但到拍彈結他畫面時，Dale即時充滿自信，瞬間投入音樂世界。
Dale過往曾為不同歌手擔任結他手，對於突如其來的廣告合作與大眾迴響，Dale直言保持平常心，坦言企喺大舞台，已有被看見的心理準備，但最珍貴係能夠喺大型場館表演嘅經驗，非常享受。除咗幕後演奏，Dale近日更以唱作人身份推出個人作品，曲詞唱一手包辦。
未來Dale將繼續以獨立歌手身份發展，並積極參與幕前演出，期待以多元風格打入主流市場。被問及最想合作嘅歌手？Dale表示冇特定目標，但渴望同不同風格嘅音樂人交流，期待產生化學作用，帶來新的火花。
而講到同音樂嘅緣分，Dale透露14歲時喺屋企有支荒廢嘅木結他，於是就的起心肝在家自學，當時純粹出於好奇，慢慢彈出興趣，自學一年後先正式跟老師學習電結他，估唔到呢支「荒廢」結他，意外成為佢音樂旅程嘅起點。
