相信唔少人都想一摘文青女神 袁澧林 芳心，究竟Angela又欣賞咩類型嘅男仔呢！日前佢就喺台灣接受專訪，無意間透露自己嘅偶像係 盧廣仲 ，仲話就算冇酬勞都願意合作。Angela冇諗到呢番話竟然變成標題熱話，仲獲偶像本尊親自傳短訊問佢係咪「無酬也要合作」。
Angela驚動到偶像私訊自己，令佢都忍唔住出Post話「救命，這件事真的太瘋狂」。面對大家嘅反應，佢話覺得時機成熟到不行，畢竟已經16年，所以決定公開自己嘅秘密「我人生唯一唯一唯一追過的星就是盧廣仲。」
那些年，中學生Angela只得15歲，身處喺追星族中一臉稚氣，佢話自己冇追車，仲解釋當年追星族係分追車派同非追車派。翻睇自己嘅舊照，Angela笑言唔知邊度嚟嘅勇氣，竟然夠膽舉手上台同偶像玩遊戲，仲贏出獲得合照機會。
佢仲分享自已追星嘅戰績「為咗偶像特地玩「噗浪」追蹤最新消息，睇演唱會嗰日仲得到本尊親自回覆。」最後小粉絲Angela祝偶像新專輯大賣，希望可以飲到廣仲嘅調酒。分享完年少輕狂嘅歷史後，Angela就怕醜話「沒什麼事我先躲一躲了」。
