郭柏姸 早前因食物敏感導致雙眼同面部嚴重紅腫，睇佢公開嘅局部相片已經夠晒誇張，好在經治療後，日前Rosita現身廣州活動時已經還原靚靚樣。而當日同樣有份出席活動嘅 高海寧 ，近日就喺社交平台貼出一張左眼又紅又腫，爆晒紅筋嘅相片。
高Ling指自己左眼過去一年不時生眼挑針同濕疹，令佢又痕又痛，但因為工作緊迫要繼續開工。高Ling話完成手頭工作後就急急返港求醫，但左眼情況越嚟越嚴重，仲爆出紅筋，高Ling喺限時動態分享相時寫上「醫生，請救救我！真係好好好痛呀～～」。
工作忙到冇停手嘅高Ling，喺公開眼疾病情前，就喺社交平台分享一批舊旅行相，全部都係養眼美照，但係佢嘅焦點就係回味自己放假時嘅笑容：「突然發現我好需要一個假期，一個長～～～～～假期。一個無所事事、可以發呆、好好感受生活的real假期，找回我的健康和笑容。」健康無價，相信高Ling都希望好好充電，等身體好好休息後再全力繼續衝刺。
