熱播劇《刑偵12》經已踏入結局篇，劇情將更加緊湊同令觀眾意想唔到，當中 Eddie彭懷安 飾演嘅鄧安，原來係導致張振朗所飾嘅刑凱解離暗黑人格Sunny嘅誘因，而日前飾演Sunny嘅Ronny黎澤恩，聯同樂隊Mr.嘅兄弟Dash、Tom同MJ到珠海開騷，本身係跳唱男子組合出身嘅Eddie亦專程到當地捧場。
正所謂冤家路窄，Ronny發現Eddie嚟睇騷之餘，仲走埋入後台，兩雄相遇嘅打招呼方式就係互相摙住對方條頸，重現劇中Sunny想摙到鄧安窒息嘅畫面。Ronny就Sunny上身喺帖文留言「鄧安，你今次仲唔死！好大嘅膽鄧安竟然闖入Mr. 音樂會後台！Sunny上台之前你竟然大搖大擺走入後台，係咪要招呼啊！Sunny立即上去摙住佢條頸。多謝佢！」
myTV SUPER重溫《刑偵12》鄧安、Sunny可怕性格
專程到珠海捧兄弟場嘅Eddie就話「第一次睇Mr. 演唱會，睇完，更加鍾意佢哋，四個唔同性格但又好鬼夾，Ronny大隻有型，MJ開心得嚟玩味重，Dash爸爸成熟穩重，Tom怕怕醜醜但打起鼓好有型。」成個騷亦勾起Eddie出道時樂壇盛勢感覺。
《刑偵12》結局篇 星期一至五晚 20:30 翡翠台