金像導演梁樂民執導；累積票房破1億嘅《寒戰》系列新作回歸，繼早前在康城電影節公開首張概念海報亮相後，《寒戰1994》首條15秒宣傳片亦正式曝光。疑為吳彥祖身穿官式晚宴制服嘅紀律部隊高官，向包括鏡頭可見劉俊謙在內；同樣穿上劃一禮服嘅同僚，語重深長話：「各位同事，我希望最高行動代號，唔會喺我任內出現。」
之後畫面出現《寒戰》經典對白「非常時期 非常方法」，而李文彬(總警司)門牌、英國秘密情報局徽號、黑社會拜關帝儀式、警車出動場面等唔同畫面亦隨之閃現。過往系列中角色人物背後都隱藏唔少機密，將會喺前傳系列逐一揭露。
電影公司今次同時公布前傳兩部曲 —《寒戰1994》及《寒戰1995》，雖然最近電影業猛追寒風，不過可見對《寒戰》前傳系列信心十足。導演梁樂民亦解釋開拍兩集前傳系列原因：「江老闆(電影公司老闆江志強)問如果重拾寒戰，前傳會拍咩，我話其實構思第一集時已有前傳脈絡。第一集戲中嘅廉署高級調查主任，質問警務處副處長李文彬(梁家輝 飾)時，已經講咗當年1995年時任O記主管嘅佢，利用非常完美嘅臥底計劃，成功瓦解一個黑社會字頭…… 呢個就係《寒戰》前傳嘅起點，不過今次故事唔局限於黑社會同警隊高層權鬥。仲會以90年代眾多富商被綁架嘅其一傳聞作為點子，牽引出社會各方陣營同最高權力核心嘅矛盾，富豪、黑社會、香港警隊等，會點樣面對之後回歸嘅大時代呢？」
作為《寒戰》系列幕後主腦，江志強亦解釋重啟系列嘅因由：「拍新一集，要俾觀眾全新視點，所以決定將時間軸推前到回歸前2、3年。呢兩年對香港係極具標致性年代，唔同階層、同背景嘅人對回歸都有唔同睇法，所以警隊有內部矛盾，商界有商界部署，黑社會又點爭取自己嘅利益，有錢家族又有家族權力上嘅暗湧，甚至英國政府亦有盤算。咁特別又複雜嘅年代，各方勢力角力就成為呢部電影嘅特色。」