由主音大雄、結他手阿東、低音結他手Harry、鍵盤手Eric同鼓手Tom組成嘅五人男子搖滾樂隊Locksmiths開鎖佬，近日推出新歌《二十婚》，新歌直接表達假如有百二歲，咁20歲結婚都唔算係早嘅浪漫想法，而歌詞帶出「早婚哲學」，而平日Rock爆嘅五子竟然不約而同都有過「衝動結婚」嘅念頭。
有別於上一首作品，今次風格屬於甜蜜愛情小品，歌詞由少爺占操刀，帶點佢早年作品《中學生應該談戀愛》嘅青春氣息，同時亦受到組合Shine《簡單而隆重》的啟發。歌曲指「廿歲結婚可能係衝動，但大個咗先發現，當初嘅心動先最珍貴」，MV就搵嚟師兄洪助昇執導。
問到有冇諗過結婚，Harry自爆：「我都唔怕直認，其實我有時都會好戀愛腦！」大雄就話：「我自己都估唔到，原來我都幾想結婚。細個嘅時候，有一位長輩成日同我講：『唔好結婚呀！無自由㗎！』大個咗發現，如果我願意拋開所謂嘅自由去結婚，我相信我一定好幸福！」Eric就笑說：「細個諗住十八歲就結婚，而家就覺得順其自然啦！」最淡定嘅係阿東：「結婚係人生必經階段，但都要等啱嘅時機。」
經歷咗樂壇新人嘅甜蜜期，成員都感觸良多，Harry坦言第二年條路難行咗很多，因為大家對佢哋嘅期望會更高；大雄補充：「而家只係一個開始，我哋會繼續努力創作！」Tom跟Eric就多謝公司同同事支持，阿東就話：「喺香港做音樂唔容易，好慶幸遇到欣賞我哋嘅樂迷。」