「華語樂壇創作天后」G.E.M.鄧紫棋相隔八年，正式宣布喺8月強勢回歸香港連開三場演唱會，成為首位踏上啟德主場館開個唱嘅香港女歌手。
《I AM GLORIA世界巡迴演唱會》係G.E.M.第四次個人大型巡迴演唱會，取自於G.E.M.本名Gloria，以父親為她改嘅名擁抱初衷。G.E.M.希望粉絲從「Gloria」初心出發，回溯音樂歷程，共同譜寫全新篇章，展露嶄新自我。
個唱1.0版本跨越亞歐美三大洲，巡演場次突破一百場，更令G.E.M.榮登全球女歌手巡演票房 TOP4以及2024華語樂壇主題巡演票房總冠軍。而G.E.M.上年喺美斯表演賽中，以高水準舞台表現驚艷全場，亦承諾歌迷一定會返嚟開騷港，今個夏天，G.E.M.承現承諾，將加強版2.0帶嚟出道初心地－香港！
到時，歌迷將會見證G.E.M.手持權杖，站立喺8米機械巨獅昂首撕裂黑暗，踏焰開場。而演唱會每個細節都被精心打磨，燈光舞美更會全面升級，加上4D特效亮相，令「GLORIA」嘅人生故事更具沉浸感、更生動、更震撼呈現喺大家眼前，做到G.E.M.喺台上講過嘅：「當你感到孤獨的時候，記住你不是一個人，如果你想要同行者，打開音樂讓我陪著你好嗎？」
而G.E.M.喺上星期更宣佈推出同巡演同名嘅《I AM GLORIA》重錄專輯，將專輯經典舊作重新錄製，更特別收錄《天空沒有極限》嘅粵語版。雖然G.E.M.前公司發聲明要求G.E.M.將重錄專輯全網下架，但G.E.M.亦火速反擊，表示：「我不會下架歌曲」，並且反問：「可否請蜂鳥音樂先結算給我自 2018 年 10 月到起，6 年 8 個月間，我所有的合法版稅呢？還有我 2019 年解約前 6 個月左右的合法勞務費至今也是還沒收到的，能否先結算給我呢？」，非常霸氣。
