洪永城Tony、向海嵐、沈震軒、張佳添、謝雪心、賈思樂、范振鋒、李思欣、李國章教授及高永文醫生等日前出席逸傑國際慈善基金會舉辦嘅「一線一希望·童心建未來」，晚宴籌得超過三百萬善款，為無數唇顎裂嘅貧困兒童提供免費的手術治療。
本身都有成立自己非營利組織嘅Tony，對於各類型慈善活動向來都義不容辭，所以得知基金會每年都會幫助超過一千位唇顎裂小朋友，Tony更加係義不容辭，佢更透露基金會將於八、九月去到貴州探訪，而自己都傾緊會唔會同行，或者係帶埋兩個囡囡一齊去行善：「不用再由我去說她們有多幸福，不如親身看看別的小朋友，可以令她們反思要活在當下，珍惜目前所擁有的一切。」提到囡囡，Tony話大女對網球有啲天份，所以老婆梁諾妍希望培育佢成為下一個李娜。
為晚宴擔任表演嘉賓嘅 沈震軒Sammy，除咗首次現場演繹個人單曲《最幸運的平凡人》外，仲同向海嵐合唱經典國語金曲《你最珍貴》。為咗宣傳新歌，Sammy既拍MV又自編自導自演網絡短劇，並邀得歐陽震華等友情客串，Sammy指短視頻係未來嘅大勢所趨，所以佢希望製作有質素嘅短劇：「發布喺所有網絡平台，公司有支持我，我亦有自掏腰包，現已推出了五集，我希望一直拍下去，可以變成《愛·回家》一樣長壽！」問到點報答呢班朋友，Sammy就話如果將來成為大導演嘅話，會邀請大家嚟佢嘅劇組開工呀。
張佳添提到早前《中年好聲音321經典大戰》安排周吉佩、古淖文、譚輝智、黃博等拎住唔同贊助商品演繹陳百強名曲，而成為網上熱話，對此添sir感慨而家做廣播媒介唔容易，節目得到咁多贊助商支持，最後一集用一首歌去多謝大家都好應該。對於張與辰被爆有位交往多年嘅同性密友Kelvin，添sir就話：「不需要對這件事有太大反應，張與辰好有才華、唱功出色，大家都好欣賞他，我深信，這單傳聞不會對他造成任何影響。」
