袁偉豪同張寶兒已經育有一子袁咕碌，夫妻喺兩星期前宣布再次成功造人，Bowie懷上第二胎，實現三年抱兩目標。喜訊公開後唔單止獲圈中好友送上大大祝福，就連網民都好關心BB嘅性別，Ben曾講過最想湊個好字，不過之前被傳媒追問BB係仔定女時，佢只係甜絲絲表示已經知道，但就叫大家競猜一吓。
當大家都響應競猜遊戲之際，輪到Bowie俾啲貼士大家，佢喺社交平台上載同老公合照話：「這卷菲林，終於曬出來了，拍的時候陀袁咕碌，看的時候已經是陀袁氹氹。」到底袁咕碌同袁氹氹係咪已經成為個好字呢？雖然性別還未揭曉，但陀B嘅喜悅同幸福獲得大眾嘅祝福，而且相中Bowie嘅笑容真係有種從心而發嘅甜美，身旁嘅阿Ben仲細心幫老婆整理頭髮。
呢種幸福光芒間直閃爆，唔少網民都讚兩夫妻好sweet，而且回看呢輯相別具意義，更有人覺得佢哋今胎似係生女。
