前全國政協副主席霍英東長子霍震霆與前妻朱玲玲育有3兒子，分別係霍啟剛、霍啟山、霍啟仁，三位都知書達禮年青有為，除咗事業之外，三位超級富二代嘅愛情故事一直被受關注。
現年36歲嘅孻仔霍啟仁係霍英東集團執行董事，平日生活低調，甚少公開露面，近日有消息指啟仁喺舊年向拍拖5年嘅泰國女友Namfon求婚成功，然而婚期一直未有公開。但近日再有喜訊傳出，霍震霆接受傳媒訪問時，被問及孻子婚事就難掩喜悅，笑笑口不經意爆出啟仁已婚成家嘅喜訊，更表示歡迎呢位年輕人(新抱)加入霍家大家庭，仲叫大家祝福佢哋，似乎對呢位新抱好滿意，講到會唔會催促一對新人快啲生BB，霍震霆就話呢啲唔到佢管。
網上去年已流出啟仁喺小艇上單膝下跪求婚，為女友帶上戒指嘅照片，場景簡單樸素，獲網民大讚夠貼地。而網上圖片就顯示，霍啟仁今年3月為未婚妻Namfon慶祝生日時就以英文留言單身的最後一個生日，保持快樂，喺一個寫上「NF」嘅蛋糕上更露出玄機，以「Happy Birthday Nam Fok」來送上祝福。有消息指出，身為設計師嘅Namfon來自一個建築師家庭，家境富裕。
而翻查霍啟仁同老婆嘅資訊，兩人去年6月中一同恩愛現身馬天佑嘅生日派對，當時除咗同好友慶祝之外，見佢哋手上捧住大束鮮花感覺甜蜜。
