黃秋生 雖然近日忙於宣傳主演嘅新戲，不過亦有喺社交平台分享同老友相聚合照﹐秋生同 黃子華 張達明 吳鎮宇 以及 劉兆銘 (Ming Sir)食飯敘舊，仲以四字「珍惜相聚」形容呢次極為難度期嘅飯局。
子華、達明同鎮宇喺1998年合作嘅《鬚根SHOW》大受歡迎破咗唔少紀錄，網民見到呢個三人組難得同場合體，都不斷留言話好掛住當年嘅演出。 2023年呢個組合亦曾經有飯局，當年出席嘅仲有影帝劉青雲，網民亦留言召喚「市民劉先生」。
相中亦見一位高大少年，其實呢位型格少男就係鎮宇嘅囝囝Feynman，佢同媽咪爸爸一齊現身飯局拜候幾位Uncle﹐身形高大嘅Feynman其實今年9月過埋生日都先係17歲，可以話係暴風式成長。
Feynman當年同鎮宇參加內地親子綜藝節目大受內地觀眾關注﹐佢亦不時都會更新自己嘅社交平台，除咗不時貼出爸爸吳鎮宇嘅爆笑黑圖之外，亦會分享自己對情緒健康嘅抒情文章，又會霸氣回擊網民話如果唔鐘意佢可以離開。
踏入青春期嘅Feynman留有一頭長髮，同以前喺綜藝節目中可愛形象相差甚遠，佢亦同朋友組隊撫摸者樂團(Stroking Strokers)夾Band，更自爆於隊中任副結他手、鍵盤手同經理人，睇嚟Feynman亦遺傳咗爸爸鎮宇嘅演藝細胞。
