梁詠琪日前去到台灣出席代言活動，出道30年嘅佢透露可以keep住靚樣嘅秘訣，就係唔好懶要勸護膚，佢笑言咁就唔怕畀路人影，Gigi呢日仲分享早前去超市時，就畀路人影相放上社交平台，佢話幸好當日自己嘅狀態唔錯呀。
嚟緊將會有新戲上映，Gigi就話相當期待，不過佢嘅fans似乎就更想偶像可以開演唱會，Gigi話一直有歌迷問佢可唔可以有演唱會，又或者係出新歌新專輯，呢日佢就話一直都有搵緊歌，又指自己剛完成一個巡迴演唱會，為咗巡演成日要飛嚟飛去其實都幾攰，所以演唱會嘅話可能要再等多一、兩年喇。
講到暑假，Gigi話會同老公飛返去西班牙探親，問到而家囡囡會唔會好黐身？Gigi即時兩眼放光話咁先好，仲話阿女唔會黐住自己太多年，所以佢願意黐就由黐，Gigi又話覺得囡囡已經係一個少女，所以爭取多啲時間同對方相處係好重要呀。