北京日前舉行一個音樂頒獎禮典禮，陳珊妮、蔡健雅等歌手盛裝赴會，已故歌手方大同生前最後一隻專輯亦入圍頒獎禮，最終大同獲封年度最佳男歌手之外，專輯《夢想家》亦獲頒年度專輯大獎，大同嘅表哥及兩位表姐代為上台領獎，負責發言嘅表哥先隔空對大同表示，知道佢會在場聽住，隨後感謝方媽畀呢個機會佢哋代大同領獎。
大同表哥指大同係喺生病嘅時候堅強地做出呢張最後嘅專輯，完全係自己一個人喺家中作曲、作詞、編曲、錄製，係佢送畀大家最後嘅禮物，表哥哽咽表示：「我想如果大同在這裏的話，他會從他的專輯裡，跟大家說一句『時光是不會倒流的，往事也不會重來，但是回憶的完美，需要每一分都保留着』。We miss you Khalil。」身後嘅表姐亦不禁落淚。
大會亦喺頒發年度男歌手獎後，播出方大同媽媽特別製作嘅4分鐘短片，片中方媽媽以聲音分享與兒子方大同一齊創作教育歌曲等經歷，方媽媽又指大同想透過最後一張專輯《夢想家》，同大家講：「祝你在未來的日子裏繼續懷抱夢想，持續努力，成長進化，在人生的每個階段，充分發揮自己的潛能。」
出道28年嘅蔡健雅就獲頒年度女歌手獎，佢笑言大會非常善良頒發呢個獎項畀佢，又坦言自己曾喺創作路上遇到迷惘嘅時期，好彩受邀為電影配樂，令佢喺創作路上再有新火花。
