陳凱琳自從發展KOL事業後，經常都會拍片分享生活，教教大家炮製美食。6月23號就係Grace生日，所以佢就出動「生日牌」將老公鄭嘉穎請出鏡，喺自己嘅煮食小節目中親自下廚炮製蒜油意大利粉。
好錫老婆嘅嘉穎拎住玫瑰花出場，俾足驚喜老婆。Grace大讚老公：「對每一樣應承咗要做嘅嘢都會俾盡心機，落足心思。」最重要係，嘉穎為咗復刻同老婆度蜜月時喺威尼斯食過嗰碟最美味嘅意粉，佢睇咗超過20條教煮片，無論係意大利、美國，抑或係非洲嘅版本都有，嘉穎仲話：「煮生日飯俾老婆喎，梗係要take it seriously 啦。」真係好閃啊！
Grace同嘉穎因為拍攝劇集《殭》結緣， Grace喺節目中就分享二人當年拍劇嘅一段往事。Grace回憶自己幫嘉穎買嘅第一份外賣就係芝士扒火治，有一晚劇組放宵夜，嘉穎留喺場景中休息，Grace就禮貌咁問佢：「不如我幫你買啲嘢啊？」，Grace當時以為嘉穎會話：「唔駛啦，我哋一齊去買一齊食啦。」或者「唔好啦，你女仔，我買返俾你食啦。」點知兩樣都唔係，嘉穎竟然話：「好啊。」然後向Grace落單。嘉穎笑言，Grace話要幫自己買嘢食，咁佢直接講想食咩都好合理。Grace就話，自己作為女仔，係想考驗呢個人對自己有冇興趣，冇諗過會得到呢個回答。
至於講到二人係點樣開始，就係當時二人拍緊戲，嘉穎做魔術師，Grace做助手，二人表演完就拖手謝幕，喺導演講完「Cut」要轉機位時，Grace冇放開手，嘉穎就話覺得如果揈開Grace隻手冇禮貌，Grace聽到呢度就反問嘉穎：「其實你有冇諗過係我覺得揈開你隻手冇禮貌啊？」，總之二人就係因為呢一次拖手而正式開始拍拖。
