台灣不老男神林志穎同韓籍金曲歌王李玖哲首度合作喺馬來西亞雲頂開騷，二人因為參與內地節目《披荊斬棘3》成為好友，因而促成今次合作。林志穎2022年經歷嚴重車禍，經過長時間復健先復出幕前，今次佢一口氣帶來11首歌，證明體能狀態恢復得唔錯。
演唱會以「回憶時光走廊」為主題，林志穎將出道33年嘅經典曲目分為影視主題曲、青春記憶、經典回憶殺三大篇章，共演唱11首歌，其中超過半數搭配全新舞蹈設計，誠意十足！佢話：「這次就是驗收我每天健走的成果！」
首次喺大馬開騷嘅李玖哲喺台上分享關於今次開騷嘅趣事，佢話媽咪第一次見到今次嘅演唱會海報時問佢：「你是跟哪個小弟弟一起唱歌？」李玖哲就同媽咪講其實50歲嘅林志穎比自己大六歲，係大哥哥唔係小弟弟，估唔到媽咪竟然答：「你怎麽看起來比較像大哥。」搞到全場爆笑。
林志穎透露為咗今次演出用咗大量時間重新製作經典曲目，自己都好努力練唱同排舞，所以希望有機會將呢個演唱會巡迴至亞洲其他地方。而李玖哲就預告嚟緊會專注創作，希望可以盡快推出新作品。
