6月23號娛樂圈傳來噩耗，資深藝人雪妮丈夫、著名武術指導唐佳，於佐敦墮樓身亡，身首異處，警方正調查墮樓原因。
現年88歲嘅唐佳原名黃唐，1960年代起同劉家良成為著名導演張徹嘅御用武術指導。80年代，唐佳亦當上導演，曾執導過電影《少林傳人》、《三闖少林》與《洪拳大師》，三部皆為功夫片佳作。
其後唐佳加入TVB擔任武術指導，於80年代末淡出香港影視圈，移民加拿大生活。90年代時因為家人唔適應當地生活而回流香港，繼續享受退休生活。
唐佳同老婆雪妮喺圈中出名嘅恩愛夫妻，二人鶼鰈情深，夫妻相愛超過半世紀，經歷高山低谷依然恩愛如昔，不時形影不離現身公開場合，每當老婆開工，唐佳都陪伴左右。皆因雪妮喺80年代時發覺耳朵受遺傳病影響，一邊完全失聰，現時一雙耳朵需要配帶助聽器，但唐佳依然不棄，而且護妻深切，為免老婆獨自行動時會造成不便，自此經常喺雪妮身邊，無時無刻為佢充當私人助聽器。