盧冠廷舉行一連兩晚紅館騷，佢除咗以感性嘅聲線帶觀眾品味佢嘅音樂世界，仲剖白自己人生中一件遺憾嘅事，就係自己從來未見過母親，佢話自己曾經問父親要母親嘅相片，可惜未有下文，而自己嘅音樂路如果可以有母親陪伴，一定會更加美好。
講起演唱會上最感動嘅一幕，LoLo就話一定係全場觀眾大合唱《陪著你走》，因為自己身為一個作曲人，聽到9000人一齊演唱自己嘅作品，等於得到歌迷派比自己一張人生最重要嘅成績表。
LoLo嘅音樂感動咗無數人，連太太唐書琛都話自己勾返起拍拖前欣賞LoLo嘅感覺，佢話自己一聽見老公唱歌就即刻變身小歌迷，覺得自己好幸福，因為老公有才華又靚仔，1983年結婚至今，雖然經歷風風雨雨，但一路攜手共度。而LoLo就話從未聽過太太喺眾人面前咁樣讚自己，不過佢最想聽到嘅就係太太講一句「I love you」，可惜太太怕醜，只肯以手勢代替。
講到人生憾事，原來LoLo懷疑過十年前母親曾經嚟過舖頭搵自己，可惜當時佢唔喺舖頭度，而太太就斟咗杯茶俾母親飲，都算係飲咗杯新抱茶。LoLo話覺得母親應該好想聽自己親口叫一聲「媽咪」，可惜天不從人願，而未能見母親一面，亦成為自己人生中嘅一大遺憾。
