陳奕迅與徐濠縈嘅愛女陳康堤CONSTANCE，今年5月中傳出將進軍樂壇，並簽約華納，不過當時就未有發布歌曲。直到今個月23號，香港華納音樂正式公佈陳康堤 CONSTANCE加盟嘅消息，並預告將會推出首支英文單曲《doll》。
以往相當重視個人隱私嘅康堤，隨住公佈入行嘅消息後，佢嘅個人IG亦由「私人」更新為「公開」，而首個post就係新歌嘅前導影片，除咗爸爸Eason有留言：「Soooooo happy and sooooo pride of you, my dearest dorda. Have fun please~ ♥️」恭喜愛女外，好友竇靖童、曾國祥、少爺占、許恩怡、汪詩詩等都有留言祝賀。
康堤嘅新歌係同詞曲創作人兼製作人 Ernest Choi 共同創作，而Ernest係以與竇靖童嘅合作而聞名。至於造型照就由香港攝影師 Issac Lam 林俊彥 操刀，Issac 指康堤剛開始影相時可能有小緊張，但佢好快就駕輕就熟，完全唔像第一次影造型照。
康堤指新歌《doll》唔單止係一首歌曲，仲係佢個人經歷嘅真情流露，佢係喺情感動盪之中創作呢首歌，用 《doll》作為比喻，描繪好似被操控嘅洋娃娃咁，被操縱嘅感受。
