周家蔚 同 洪天明 結婚13年並誕下兩子，近年轉型做KOL嘅Janet更不時會喺社交平台分享家庭生活，睇落相當溫馨。
不過近日就有傳媒影到Janet孖好姊妹佘詩曼出席酒店活動後，全不避嫌挽住前唱片公司高層王凱文步出場地，隨後兩人聯同兩位男士轉場到一間私人會所夜蒲，Janet一直玩到凌晨一點幾先自行離開，期間都冇見到老公出現。
而長年喺內地搵食嘅洪天明，先後都被過傳背妻偷食，更試過被影到攬女夜蒲同拖女現身碼頭。雖然Janet公開撐老公，天明亦從此冇再傳出花邊緋聞，但報道就指二人婚姻早早露出裂痕，目前只係表面恩愛，其實各有各精彩。
不過Janet對疑似婚變、被指背夫偷食一事亦迅速作出澄清回應傳媒，指當日係現身一個就職典禮，賀表弟做主席。而所謂「一拖三夜蒲」，其實係其他朋友以及表弟都在場。自己同王凱文友誼情同兄妹，老公亦認識對方，會蹺住對方都係只因太耐冇著高踭鞋，所以要扶住人行。Janet更向傳媒強調同老公夫妻感情不變，愛老公愛到仍然係會用心心眼望對方，二人溝通良好，所以大家都唔駛擔心。
