陳自瑤 張頴康 林凱恩 同 龍婷主持一共5集嘅《養生之旅 湖北篇》6月23號晚起，一連五日晚上10點半喺翡翠台播出。今次係阿康同Yoyo相隔十年重遊舊地，兩人分別喺社交平台分享今次拍攝點滴。
阿康話10年前拍攝《朝拜武當》時去過湖北嘅武當山，當時佢同自己講，應該有生之年都唔會有機會再去當地。阿康冇諗過，竟然十年後，佢因為拍攝旅遊節目而再次舊地重遊。最令佢意想唔到嘅係，10年前後都係同Yo姐一齊去，不過阿康嘅重點就係「我哋都算保養得幾好」。睇番阿康分享嘅相，佢同Yoyo嘅容貎就好似凍齡一樣，完全冇乜點變。
Yoyo同樣都話自己當初拍完《朝拜武當》之後，冇諗過會再去武當山，而今次同已經榮升為「康哥」嘅張頴康一齊去，究竟係緣份定係冥冥中有安排呢？Yoyo仲專登去番10年前同一個地方度再影一張相，佢話眨眼就10年，大家又覺得佢十年來有冇咩變化呢？
