自4歲已經接觸K-pop、5歲時仲由BLACKPINK小歌迷變成醉心演出表演者嘅 陸海悠（Hazel），當時年紀小小就已定下成為跳唱歌手嘅目標。喺唔影響學業下經父母悉心栽培，Hazel獲專業導師指導唱歌同跳舞，8歲時更開始挑戰創作歌曲，今年只得9歲嘅佢，仲推出首支兼任作曲、填詞嘅英文單曲《Cotton Candy Dreams 》。
歌曲靈感源自Hazel對夢想嘅渴望：「想大家知道無論鍾意畫畫、跳舞或者唱歌，鍾意任何嘢都要繼續追夢，希望聽到呢首歌嘅人，都能夠好似棉花糖一樣甜甜咁微笑！」首次拍攝MV令Hazel相當難忘：「有少少辛苦，譬如冇乜時間食嘢，會好肚餓。」不過MV講述Hazel同朋友喺波波池玩，寓工作於玩樂，輕易忘記「飢餓感」。
多才多藝的Hazel 6歲就開始學唱歌同舞蹈，早前仲喺啟德體育園開幕禮上，與內地天后李宇春演繹《和你一樣》同台合唱。Hazel過往曾於近50個唱歌同跳舞比賽奪獎，當中更包括多個冠軍。
去年Hazel更衝出香港，於東京舉行嘅《Global Arts Sports & Culture Association Sing Contest》奪得亞軍；4月又先後參加韓國KBS電視台嘅練習生活動《해외연수생》，以及代表香港到首爾《IVEX studio》演出《The Future Idol Stage》。Hazel仲話：「好開心去外地參加比賽同演出，係好難得經驗，仲可以同爹哋媽咪順便去旅行，嗰次去日本比賽仲啱啱遇着聖誕節，周圍都好靚，一家人玩得好開心。」
