《超人》呢個全世知名嘅超級英雄電影系列重啟，早前主播 王鎮泉 就獲邀到馬尼拉同電影公司高層 James Gunn 見面，更了解到招牌紅色底褲重現超人身上，其實係內部幾經爭論嘅結果。
James Gunn指大家唔會相信呢個爭論嘅激烈程度，其中製作設計師Beth同服裝設計嘅Judianna，就代表住唔同睇法。而James喺睇完主角分別身穿有底同冇底嘅造型後，個人喜歡無底版，不過主角 David Corenswet 就表明對有底嘅扮相更為鍾情，認為來自外星嘅超人應該唔會令小朋友懼怕，而有紅色底底外露先係嗰回事。
James多年來雖然製作過無數電影，不過佢對港產片其實非常著迷，當中《赤裸羔羊》仲係一提起就非常雀躍，而佢心中女神更係早已息影嘅無數港仔女神：邱淑貞。佢更指豆豆地位無可取代，更不時會同豆豆千金 沈月 於網上聊天，仲話要邀請豆豆出山，想演咩角色、英雄任佢決定，仲開口話可惜已經結婚，唔係豆豆一定會成為佢一生最愛呀。
