三屆《中年好聲音》唱將 周吉佩 支嚳儀 譚輝智 黃博 張與辰 羅啟豪 黃劍文 趙浚承 龍婷 顏米羔 等日前齊集電視城，為《好聲音夏日音樂會》錄影，主題講到明係夏日，一眾歌手就梗係準備咗非常有夏日氣息嘅《熱力節拍Wou Bom Ba》、《200度》炒熱氣氛。
至於主持方面，就由「中一生」周吉佩同支嚳儀擔任，早兩個星期先同譚輝智做完紅白大戰隊長嘅支支就話，兩位男士都係佢最鍾意嘅主持班底，吉吉就覺得自己同支支默契十足，仲可以不時互串，大讚支支主持能力大大提升，而輝智笑稱支支係「支大師」，要向師姐學習學習。
黃博嘅新歌《有一種執著》雖然推出冇耐，已經得到唔少好評，連張與辰都話睇完阿博嘅MV覺得好感動，好想俾阿博一個大大擁抱，讚阿博真係好叻！與辰嘅個人單曲亦快將推出，佢就叫大家要好好期待自己喺MV嘅演技，因為佢都唔知自己演咗啲咩，因為導演嘅要求都有啲抽象。
羅啟豪、黃劍文同趙浚承三位情歌王子難得同台，三人就攜手帶來《青春頌》、《高山低谷》、《我們都是這樣長大的》經典歌曲Medley。劍文就話係啟豪、浚承帶自己入歌，令佢覺得好有Feel，佢地都想下次再合作試下加入戲劇元素。
龍婷呢次一改斯文形象，同顏米羔載歌載舞《非常夏日》，而且仲向高難度挑戰，米羔要接住龍婷擺出超型Pose。而節目中除咗有連串好歌，米羔、劍文同Gary仲拍攝咗一段短片，當中有個彩蛋，粉絲們記住留意啦！
《好聲音夏日音樂會》6月28號 星期六晚 21:00 翡翠台