葉蒨文Sophie 近日喺節目《女神配對計劃》中表現亮眼，收納嘅3位裙下之臣各有千秋，喺過程中令Sophie同追求者之一 曾展望GM 人氣爆升。
以一個真人騷嚟講，除咗現場氣氛令人動容之外，好嘅幕後團隊亦不可或缺，正因為Sophie成日都被觸動搞喊，所以決定公開催淚背後嘅關鍵人物，就係節目監製莫文浩瞓覺嘅照片，Sophie仲搵埋羅毓儀Yuki一齊整蠱做怪合照。
Sophie將照片上載到社交平台並發文「公審」節目監製，但實質係明踩暗讚，佢留言話：「成日整喊我，勁Emo...，未見過啲咁衰嘅監製，做嘢又落力又有心，搞到成日攰到周圍瞓，份人又易相處，又有幽默感，團隊個個都咁好人，搞到我學識咩叫團隊精神同埋領導才能！你有冇問過我想唔想學依啲嘢？你知唔知你咁樣會搞到人哋覺得你好有人情味。」仲話好想瘋狂同呢位監製合作，最後仲搞笑問對方「你知錯未？！仲敢唔敢剪啲片出嚟嚇我！衰人！！！！！你出街瞓！」
有網民睇完Sophie嘅發文覺得佢好可愛，反問佢點解你可以咁得意嘅？感人得來仲有啲幽默感，係咪學晒GM啦？還記得之前GM喺訪問中都成日用Sophie所講嘅字眼Emo。亦有人話其實都幾鍾意睇個監製整喊Sophie，更有人大讚節目中嘅女神值得被愛。
