Liza姐汪明荃忙完馬來西亞演唱會，馬不停蹄出發拍攝新節目《帶阿姐看世界》。繼早前同周嘉洛去澳洲，與周奕瑋去日本後，今次就有阮浩棕帶阿姐遊摩洛哥。
阿姐同Nicholas抵達摩洛哥之後隨即展開行程，連日來見到阿姐喺社交平台po相，包括喺舍夫沙萬藍色城市，挑戰坐高空吊椅，背後就係成片城市美景，非常賞心悅目。另一日阿姐就去到第二個城市非斯，見阿姐著住色彩繽紛嘅服飾，戴上特色彩色草帽，同當地嘅人文風情完美結合。
阿姐之前同周奕瑋遊日本時同櫻花合照，因為陽光刺眼，惹來阿姐黑面嘅誤會，今次去到陽光更加猛烈嘅非洲，阿姐明顯有備而來，唔同款式嘅草帽加太陽鏡，無論陽光幾勁都可以展現燦爛笑容啦！
