陳奕迅同徐濠縈嘅愛女陳康堤加入樂壇嘅首隻英文單曲《doll》，MV喺6月26號夜晚九點正式上架，大家終於可以聽到Eason愛女嘅歌手處女作表現如何。
MV中康堤變換多個造型，包括純白夢幻沙裙、黑色貼身裙、同埋運動短裙look等，髮型同妝容搭配唔同造型都有變化，而康堤嘅造型當然不假他人之手，由媽咪徐濠縈一手包辦。康堤喺MV中某啲角度睇上去的確好有媽咪嘅神韻。
呢首歌由康堤同年輕音樂人Ernest Choi聯手創作，有眼利嘅網民及現喺歌曲創作名單中，赫然見到Eason Chan有份編曲，不過呢位Eason就唔係爸爸陳奕迅，而係另一位音樂人Eason YH Chan陳易行。
爸爸Eason當然都好主持阿女出歌，早幾日已經搶先喺康堤IG留言「Soooooo happy and sooooo pride of you, my dearest dorda. Have fun please~」。另外仲有唔少圈中人包括鄭秀文、容祖兒，以及同屬星二代嘅竇靖童等，都有留言為康堤打氣。
唱片公司亦喺MV上架當日po出一段短片，當中見到當年得兩歲嘅包包(康堤乳名)出現喺爸爸Eason專輯封面嘅可愛模樣，到如今已經成長為亭亭玉立嘅型格女歌手，背景音樂搭配Eason嘅歌《大個女》，真係完全呼應晒歌詞。
