曾經喺亞洲地區紅極一時嘅日本女團AKB48，今年十月將登陸香港舉行演唱會，今次亦係AKB48自2005年成軍以來第一次喺香港辦專場演唱會，消息一出令香港粉絲非常興奮。
今次將有16位成員來港演出，包括伊藤百花、千葉惠里、八木愛月、佐藤綺星、山内瑞葵、花田藍衣、秋山由奈、小栗有以、倉野尾成美、向井地美音、坂川陽香、大盛真歩、平田侑希、武藤小麟、下尾美羽、新井彩永。
AKB48由製作人秋元康於2005年創立。為咗慶祝成軍20周年，官方宣布將於今年8月起舉行巡迴演唱會。首站定於8月喺愛知縣展開，其後會移師大阪同廣島；9月同10月就會喺上海同香港開騷。至於尾場雖然未正式官宣，但就有消息指出應該喺12月會喺東京嘅武道館舉行。
除咗有20周年演唱會，AKB48仲會推出第66首單曲，並且安排四位已經畢業嘅昔日人氣成員前田敦子、高橋南、小嶋陽菜以及指原莉乃回歸為新單曲助陣，令AKB新舊粉絲興奮又期待。
