高級時尚品牌於上海打造全球最大嘅展覽裝置，除咗巨輪建築相當壯觀外，開幕紅地氈亦邀請咗大批頂流紅星到場，包括王嘉爾、周冬雨、宋茜、金晨、王鶴棣、白敬亭、歐陽娜娜、朱一龍等。
大會安排咗一場特別嘅訪談環節，請嚟啱啱喺香港舉行完棟篤笑嘅歐陽萬成同Jackson對談，兩位同樣喺香港長大，繼而揚名國際，加上父或母都係上海人，兩人背景相似，一見面就惺惺相惜雞啄唔斷。
原來佢哋一早已經係網友，Jackson仲以父母起誓，指自己成日睇Jimmy嘅talk show嘅短片，係對方嘅頭號fans，Jackson仲即場演一段Jimmy喺講過嘅笑話。Jimmy就話非常榮幸Jackson有留意到自己，佢又指今次係首次見到Jackson真人，之前一直都係以短訊交流，Jackson亦趁機投訴，話Jimmy呢個大忙人成日唔覆機，不過對方秒速否認呀。
兩位講講下仲提議不如一齊搞個show，Jimmy負責講Jackson負責唱，Jimmy指自己唱歌還可以，但跳舞就冇呢個天份，仲叫Jackson教一教自己，不過Jackson似乎對Jimmy爸爸更感興趣，問到時可唔可以邀請對方到場，而Jimmy亦一口答應。
一眾花旦小生亦有透露未來工作安排，作為品牌大使嘅龔俊就表示將要到國外工作一個月、王鶴棣就表示自己正拍緊新劇、金晨就話自己拍緊戲，角色仲係佢非常鍾意嘅、宋茜亦指自己忙拍戲，而白敬亭就話暫時睇緊劇本。